ئەندامی پێشووی مەکتەبی سیاسی یەکگرتوو: کۆنگرەی داهاتووی یەکگرتووی ئیسلامی دیزانیکراو دەبێت ئەندامی پێشووی مەکتەبی سیاسی یەکگرتووی ئیسلامیی کوردستان ئاشکرای کرد: ئەمینداری ئێستا دەیەوێت دەستکاری پەیڕەو بکات و هەرخۆی بڕیاردەر مەرجەع بێت بەپێی هەواڵی کوردپرێس، ئەبووبەکر عەلی، ئەندامی پێشووی مەکتەبی سیاسیی یەکگرتووی ئیسلامیی کوردستان لە چاوپێکەوتنێکدا لەگەڵ کەناڵی ڕووداو ڕایگەیاند: کۆنگرەی داهاتووی یەکگرتووی ئیسلامی دیزانیکراوە و زۆر ئاسایی بەڕێوەدەچێت و هیچ پرسێکی فکری تیادانابێت. بەگوێرەی پەیڕەوی یەکگرتووی ئیسلامی، ئەمینداری ئێستا ناتوانێت خۆی هەڵبژێرێت، چوونکە دوو خولەکەی خۆی تەواوکردووە، ئەوەی لە بیری ئەمینداری گشتی و کەسانی دەوروبەریدایە دوو سیناریۆیە. ۱- دەستکاری کردنی پەیڕەوەی ناوخۆ و رێگە خۆشکردن بۆ هەڵبژاردنەوەی ئەمینداری ئێستا، بۆ ئەوەی درێژە بە دەسەڵاتەکانی بدات. ۲- ئەگەر ئەوەش تەگەری بۆ دروستبوو، کەسێک بە ڕووکەش بکەن بە ئەمینداری گشتی یەکگرتووە، لەگەڵ دروستکردنی ئەنجومەنێک، لەپێناو ئەوەی دەسەڵاتی ڕاستەقینە هەر بە دەست ئەمینداری ئێستاوە بێت و هەر خۆی بڕیاردەر و مەرجەع بێت.

ئەنجومەنی سەرکردایەتیی یەکگرتوو بڕیارەکەی خۆی هەڵوەشاندەوە؛ شه‌ش ئەندامی دوور خراوی یەکگرتوو دەتوانن به‌شدارى كۆنگره‌ى نۆیه‌م بكه‌ن. ئه‌نجومه‌نى سه‌ركردایه‌تى یه‌كگرتوو كۆ بووه‌وه‌ و بەوتەی سه‌رۆكى ئه‌نجومه‌نى سه‌ركردایه‌تى یه‌كگرتوو له‌ كۆبوونه‌وه‌کەی ئه‌مڕۆیدا هه‌ڵوه‌سته‌ كراوە له‌سه‌ر بڕیارى به‌شداری نه‌كردنی ئه‌ندامێتى شه‌ش ئەندامی حیزبەکە کە بۆیان نابێت به‌شدارى كۆنگره‌ى نۆیه‌م بكه‌ن. بەپێی هەواڵی کوردپرێس، سه‌رۆكى ئه‌نجومه‌نى سه‌ركردایه‌تى یه‌كگرتوو دەڵێت، سه‌ركردایه‌تى بڕیاریدا به‌ ڕاگرتنى كاركردن به‌و بڕیاره‌ و داوای كرد لیژنه‌ى باڵاى هه‌ڵبژاردنى ئه‌ندامانى كۆنگره‌، پێداچوونه‌ بكات به‌ مه‌رجه‌كانى ئه‌ندامێتى ئه‌و کەسانە و كارئاسانى بكات بۆ به‌شداربوون له‌ كۆنگره‌ى نۆیه‌مى یه‌كگرتوو، له‌ ڕۆژانى 27 و 28ى ئه‌م مانگه‌دا. هەروەها دەڵێت داوا له‌ دوو له‌و کەسانە ده‌كات كه‌ هه‌ندێ لێدوانى نه‌خوازراویان داوه‌ بۆ میدیاكان، داواى لێبووردن له‌سه‌ركردایه‌تى و رێكخستنه‌كانى یه‌كگرتوو بكه‌ن.