نوێژی جەژنی پیرۆزی ڕەمەزان لە مزگەوتی سەر بە ئەھلی سوننەتی تاران، بە ئامادەبوونی ھەزاران نوێژخوێن، بەڕێوە چوو. سەر لە بەیانی ڕۆژی چوارشەممە، 16ی پووشپەڕ، درگاکانی مزگەوەت بۆ خەڵکی کرایەوە و ڕێوڕه‌سمی تایبەت بە جەژنی پیرۆزی ڕەمەزان، پاس خوێندنی نوێژی بەیانی، بە خوێندنی قورئان و تەکبیرکردن، دەستی پێکرد. وێڕای ڕاگەیاندنی پێشوو بۆ ئەوەی کە نوێژ، کاتژمێر 8ی بەیانی بەڕێوە دەچێ، بەڵام بەھۆی پێشوازیی زۆر لەلایەن نوێژخوێنانەوە، کاتژمێر 7ی بەیانی ناوو و دەرەوەی مزگەوت پڕ بوو لە خەڵکی. پاشان، لێژنەی بڕواپێکراوانی مزگەوت مەجبور بوون کە ئاڵوگۆڕێک لە بەرنامەکاندا پێک بێنن و نوێژەکە زووتر لە کاتی خۆی بەڕێوە ببەن. پاش خوێندنی نوێژ، خوتبە و وتارەکانی جەژن لەلایەن مامۆستا عه‌زیز بابایی پێشکەش کرا. لەم کاتەشدا خەڵکی ھەر بەرەو مزگەوت ئەھاتن، بە شێوازێک کە ناوو و دەرەوەی مزگەوت لە خەڵکی ئاخنرا کە ئەمەش بوو بەھۆی ئەوەی کە دیسانەوە نوێژ و وتارەکانی جەژن دووپات کرایەوە. سه‌ردان و ھاتنی نوێژخوێنان درێژەی ھەبوو تا ئەوەی کە نوێژی جەژن، بۆ جاری سێھەم و چوارەم چەنپات کرایەوە و کاتژمێر 9ی بەیانی کۆتایی ڕێوڕەسمە ڕاگەیێندرا. بە ھۆی زۆری و قەڕەباڵخی خەڵکەوە، وتارخوێنی نوێژی جەژن، مەجبوور بوو کە خوتبەکان بە کورتی بخوێنێ و چەنجاریش دووپاتی کاتەوە. وتارەکەشی سەبارەت بە ڕۆژوو و دەستکەوتەکانی ئەم مانگە پیرۆزە و ھەوڵدان بۆ پاراستنی ئەم دەسکەوتانە بوو. شایانی باسە کە پۆلیسی ئەمنی ناوچەکە، لە سەرەتای کرانەوەی درگاکانی مزگەوت، ھاوکارییان لەگەڵ خەڵکی کرد و وێڕای درێژخایەنبوونی ڕێوڕەسمەکە، بەوپەڕی کراوەیی و ڕووخۆشیەوە، پارێزگاریان لە خەڵکەکە ـ کە ژماریان زیاتر لە حەوت ھەزار کەس بوو ـ کرد.