"کۆنگرەی تەسەوف له‌لایه‌ن په‌یڕه‌وانی ته‌ریقه‌تى نه‌قشبه‌ندى و قادرى له هه‌ولێر ده‌به‌سترێت و تێیایدا زیاتر له 600 که‌سایه‌تی ناسراوی ئایینی و عێرفانی له وڵاتانی جیهان به‌شدارن و بڕیاره چه‌ندین لێکۆڵینه‌وه له‌سه‌ر ته‌سه‌وف پێشکه‌ش بکرێ."
دوکتۆر مه‌ریوان نه‌قشبه‌ندی، وته‌بێژی لیژنه‌ی ئاماده‌کاری کۆنگرهی نێونەتەوەیی تەسەوف له دیمانه له‌گه‌ڵ کوردپرێس وتی: ڕۆژانی27 و 28ی ئه‌م مانگه کۆنگرهی نێونه‌وته‌وه‌یی ته‌سه‌وف له شاری هه‌ولێر به‌ڕێوه‌ده‌چێت که بڕیار بوو ئه‌م کۆنگره له 18 و 19ی ئه‌م مانگه به‌ڕێوه‌بچێت، به‌ڵام له‌به‌ر ئه‌وه‌یکه کۆنگرهی نه‌ته‌وه‌یی کورد هه‌یه، کۆنگرهی ته‌سه‌وف دوا خراوه .
سەبارەت بە بەشداربووانی کۆنگرەکە وتی: "بڕیار وایه نێزیکه‌ی 600 که‌سایەتی له سه‌رتاسه‌ری دونیادا به‌شدار بێت؛ له هه‌رێمی کوردستان، ئێران، عێراق، تورکیا، لوبنان، ئۆ‌ردو‌ن، سعوودییه، میسر و ئه‌مه‌ریکا و چه‌ند وڵاتێکی ئه‌ورووپا که هه‌موو مه‌رجه‌عه گه‌وره‌کان و ئه‌وانه‌ی وا شاره‌زا و ناسراون له بواری ته‌سه‌وف و عیرفاندا هه‌موو بانگهێشت کراون."
مه‌ریوان نه‌قشبه‌ندی به ئاماژه به‌وه‌یکه لێژنه‌یه‌کی ئاماده‌کاری له چه‌ندین که‌سایه‌تی ئایینی و ئه‌هلی ته‌سه‌وف له هه‌رێمی کوردستان بۆ به‌ڕێوه‌بردنی کۆنگره‌که پێکهاتووه، وتی: له سلێمانی و هه‌ولێر و دهۆک له هه‌ر دوو ته‌ریقه‌تی قادری و نه‌قشبه‌ندی و هه‌روه‌ها له ته‌ریقه‌تی ریفاعی چه‌ندین که‌س ئه‌ندامن له ناو لێژنه‌که‌دا و هیچ لایه‌نێکی حیزبی و حکوومی به‌رپرس نییه له‌م کۆنگره‌یه و هه‌موو ئه‌هلی ته‌سوفن و خۆیان هه‌موو شتێکی ڕێکده‌خه‌ن و به‌رنامه‌ی کاری کۆنگره‌که له‌لایه‌ن خۆیانه‌وه داڕێژراوە.
له‌باره‌ی ئامانجی به‌ڕێوه‌چوونی ئه‌و کۆنگره له‌م ساته وه‌خته‌ی بارودۆخی ناوچه‌که و جیهانی ئیسلام وتی: "هه‌ستمان کردووه که ململانێی ئایینی و مه‌زهه‌بی ناوچه‌که‌ی گرتووه به‌تایبه‌ت له سووریا، عێراق و زۆر شوێنی تر و ئێمه هه‌ست ده‌که‌ین ئه‌مه شکستی ئه‌حزابی سیاسییه که به ناوی ئیسلامه‌وه کاریان کردووه و بۆ ئه‌وه‌ی که ڕووی جوانی ئیسلام و ڕێنوێنه‌ییه‌کانی ئایین له‌سه‌ر ئاشتی و سه‌قامگیری بۆ ناوچه‌که بگه‌ڕێته‌وه هه‌وڵ ده‌ده‌ین ئه‌م کۆنگره به باشترین شێوه به‌ڕێوه‌ببه‌ین و دواتر چه‌ندین ڕاسپارده‌یی و نه‌خشه‌ڕێگا به ناوی کۆنگرهی ته‌سه‌وفه‌وه ده‌ربکه‌ین."
زیادی کرد: "ئامانج له به‌ڕێوه‌چوونی ئه‌م کۆنگره ئه‌وه‌یه بۆ دونیا بیسه‌لمێنین ئیسلام هه‌رگیز بانگه‌شه‌ی خوێنڕشتن و شه‌ڕ ناکات و ئه‌هلی ته‌سه‌وف که کاتی خۆی ڕابه‌رایه‌تی کاروباری ئایینیان کردووه و شێخه‌کانی ته‌ریقه‌ت کاتی خۆی ڕابه‌رایه‌تی ده‌عوه‌ی ئیسلامییان کردووه هیچ کێشه‌یه‌کی به‌م شێوه‌یە قووڵ له نێوان لایه‌نه‌کاندا نه‌بووه و ئه‌مانه‌وێ ڕۆڵی ئه‌وانه بگه‌ڕێته‌وه بۆ جارێکی تر و به‌رنامه‌یه‌ک بخه‌ینه ڕوو بۆ ئه‌وه‌یکه حکوومه‌ته‌کانی گشت ناوچه‌ی ڕۆژهه‌ڵاتی ناوه‌ڕاست کاری له‌سه‌ر بکه‌ن به‌ڵکوو ئه‌و ململانێیه تایفییه وا هه‌یه دووری بخه‌ینه‌وه و مه‌به‌ستمانه که ئاشتی بگه‌ڕێته‌وه بۆ ناوچه‌که و ڕووی ڕاسته‌قینه‌ی ئایینی ئیسلام بگه‌ڕیته‌وه و پێیان بڵێین که له ته‌سه‌وف، ئه‌و ڕێبازه‌یه که جیاکاری ناکات له به‌ینی مه‌زهه‌به‌کاندا و سوننه و شیعه هه‌موو ئه‌بێ وه‌کوو یه‌ک بن و حکوومه‌ته‌کانیش ئه‌بێ ڕێزی لێبگرێن و هه‌وڵ ئه‌ده‌ین ئایین له سیاسه‌ت دوور بخه‌ینه‌وه به‌ڕاستی و ئه‌وه یه‌کێک له ئامانجه‌کانه که ڕابگه‌یێنین ته‌سه‌وف بڕوای به پێکه‌وه‌ژیان هه‌یه و هه‌میشه دووره له سیاسه‌ت و ئه‌وانه‌ی که له ڕێبازی ته‌سه‌وف کار ئه‌که‌ن ئه‌بێت هه‌میشه له سیاسه‌ته‌وه دوور بن."
سەبارەت بە بانگهێشتکراوان بۆ کۆنگرەی نێونەتەوەیی تەسەوف وتی: هیچ که‌سایه‌تییه‌کی حکوومی و سیاسی له هیچ وڵاتێک بانگهێشت نه‌کراوه و ئه‌و که‌سانه‌ی که بانگهێشت کراون هه‌موویان به سیفه‌تی شه‌خسی وه‌کوو که‌سایه‌تییه‌کی ته‌سه‌وفین و هیچ که‌سێک ڕه‌سمییه‌تی پێنه‌دراوه وه‌کوو ڕه‌سمی ده‌عوه‌ت بکرێت، به‌ڵکوو ئه‌و که‌سانه که دێن هه‌موو وه‌کوو ئه‌هلی ته‌ریقه‌ت و ته‌سه‌وف دێن."
مه‌ریوان نه‌قشبه‌ندی ڕاشیگه‌یاند که ئه‌و که‌سایه‌تییانه‌ی که بانگهێشت کراون هه‌موویان ناسراون و هه‌موو گه‌وره مه‌رجه‌ع، شێخ و که‌سایه‌تییه ناسراوه‌کانی ته‌ریقه‌تن له دونیادا و له‌وانه؛ دوکتۆر بیونێر له ئه‌مه‌ریکا که پڕۆفیسۆره له بواری ته‌سه‌وفدا و ده‌یان کتێبی هه‌یه له‌و بواره و کەسایەتییەکی تر دوکتۆر عومه‌ر نه‌قشبه‌ندییه که له زانستگای ڕیازدا بووه و یه‌کێکه له‌و که‌سایه‌تییه گه‌ورانه‌ی ته‌ریقه‌ت و ته‌سه‌وفە لە ئاستی جیهاندا و که‌سایه‌تییه ئایینی و عیرفانییه‌کان له لوبنان، ئێران، تورکیا و ده‌یان وڵاتی تری جیهان بەشدارن.
ئاماژه‌ی به‌وه‌ش کرد که ئه‌م کۆنگره‌یه هه‌موو که‌س به دڵی نییه و په‌یامه‌کانی ئیسلامی سیاسی و ئه‌و ئه‌حزابه ئیسلامییانه‌ی که وا هه‌ست ئه‌که‌ن ئه‌م کۆنگره‌یه له دژی ئه‌وانه با باش بزانن که ئه‌م کۆنگره له دژی که‌س نییه و دڵنیاین که هه‌ر له ئێستاوه هه‌وڵ ده‌ده‌ن پلان دابنێن بۆ شکستهێنانێکی پێشوه‌خته‌ی و هه‌وڵ ئه‌ده‌ن ته‌فره‌قه دروست بکه‌ن له ناو ئه‌هلی ته‌سه‌وف و به‌تایبه‌تی له نێوان ته‌ریقه‌ته‌کاندا، به‌ڵام به پشتیوانی خواوه ئه‌و قۆناغانه هه‌موو تێئه‌په‌ڕێنین.
وته‌بێژی کۆنگره‌که له‌باره‌ی به‌رپرسیارێتی پاراستنی ئاسایشی کۆنگرهی نێونه‌ته‌وه‌یی ته‌سه‌وف ڕایگه‌یاند: له‌به‌ر ئه‌وه که له شاری هه‌ولێر، پایته‌ختی هه‌رێمی کوردستان ده‌کرێت، ئه‌بێت حکوومه‌ت پارێزگاری لێبکات و وه‌کوو هه‌ر کۆنگره‌یه‌کی تر که له‌و وڵاته و هه‌رێمه ئه‌به‌سترێت ئه‌بێت ئه‌وان پارێزگاری لێبکه‌ن. ئه‌گه‌رچی ئێمه داوا ناکه‌ین که که‌س پارێزگاری لێبکات چونکه بڕوا ناکه‌ین ئه‌وانه وا دێین پێویستیان به پارێزگاری بێت.
مه‌ریوان نه‌قشبه‌ندی سه‌باره‌ت به‌وه‌ی که له هه‌واڵه‌کاندا هاتووه ئه‌و کۆنگره هۆکارێک ده‌بێت بۆ کردنه‌وه که‌ناڵێکی تایبه‌ت به ته‌سه‌وف له هه‌رێمی کوردستان، وتی: به ته‌ئکید ئه‌وه یه‌کێک له به‌رنامه‌ی کاره‌کانی کۆنگره ده‌بێت. که‌ناڵی ته‌سه‌وف له زۆر شوێنی دونیا کار ده‌کات. ئێمه‌ش ده‌مانه‌وێت وه‌ک شوێنکه‌وتوانی ته‌سه‌وف له کوردستان که‌ناڵێکی ڕاگه‌یاندن بکه‌ینه‌وه که بتوانین په‌یامی ته‌سه‌وف بگه‌یێنین به سه‌رتاسه‌ری ناوچه‌که و به زمانه‌کانی کوردی ، عه‌ره‌بی ، فارسی و ئینگلیزی و تورکی ئه‌و که‌ناڵه به‌ڕێوه بچێت.
ڕه‌تیشکرده‌وه‌که بۆ کردنه‌وه‌ی ئه‌و که‌ناڵه هیچ که‌س و لایه‌نێکی حزبی و حکوومی یارمه‌تیان بدات و وتی: هه‌ر موساعده‌یه‌کی حکوومه‌ت، وڵاتان، حکوومه‌ته‌کان یان حیزبه‌کان گه‌وره‌ترین شکست ئه‌بێت بۆ ته‌سه‌وف، چونکوو تا ئێستا ئه‌هلی ته‌سه‌وف دوورن له هه‌موو کاروبارێکی سیاسی و به‌تایبه‌تی له ناو کوردستاندا دووریان گرتووه له سیاسه‌ت و نابینرێت هیچ که‌سێک و هیچ پاڵێوراوێکی نه‌قشبه‌ندی و قادری له ناو دامه‌زراوه سیاسییه‌کانی ده‌وڵه‌تدا بن و له ناو دامه‌زراوه‌ی حیزبه‌کانا کاریان نییه و کارێکی سیاسی ناکه‌ن و هه‌موو ئه‌هلی ته‌سه‌وف به‌وه ناسراوه که هه‌موو دووره له سیاسه‌ت.
بۆچوونه‌کان