به ناوی خوا
سەرنامە بەناوی تۆ خودایە چی بێ ئەوە پیت و پێزی نایە
ناوت بووە شەوچرا لە بەرمان بۆ دەردی دەروون دەبێتە دەرمان
بێ ناوی تۆ نامە هیچ و پووچە نەت نووسێ بنووس كەچ‌وكرووچە
خوێنەران ماڵپەڕی ئیسلاح وێب!
سڵاوێكی گەرم و سۆزدارانە؛
له دونیای ئەمرۆدا، كۆمەڵگاكان به كۆمه‌ڵگای فره‌كلتووری ناسراون، بەشێوەیەك كە كەمتر كۆمەڵگایەك دەتوانی پەیدا بكەیت كە تەواوی ئەندامانی ئایینزا و زمان و كلتوور‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌یان هاوچه‌شن بێت؛ كەواتە تا كاتێك كە شارۆمه‌ندانی كۆمەڵگایەك بەهۆی كۆسپ و تەگەرەی ڕامیاری و كۆمەڵایەتی و ئابوورییەوە نەتوانن بەشێوەیەكی كارامە لە بڕیارداندا بەشداریان هەبێت، ناتوانن كۆمەڵگایەكی مرۆڤدۆستانەی پێشكەوتوو دەسته‌بەر كەن؛ كه‌واتە لەوەها كۆمەڵگایەكدا بەردەوام لەلایەن زۆرینەی خاوەن دەسەڵاتدارانه‌ه‌وه دەچەوسێندرێتەوە.
تاكاتێك كە بنەماڵەیەك لە كەمترین كەرەسەكانی ژیان بێبەهرە بێت یا تاكێك بەهۆی ئاوێتەبوون بە شوناسێكی كۆمەڵایەتی _ كلتووری تایبەت، نەتوانێ ڕۆڵی كۆمەڵایەتی شیاوی خۆی ببینێت، ناتوانی چاوەڕوانی گوڵكردنی تواناییە ئینسانییەكان و هەروەها دروستبوونی كۆمەڵگایەكی یەكگرتوو بكەیت.
بۆ ئەوەی شووناسە جۆراوجۆرە كۆمەڵایەتییه‌كان بتوانن لەپەنایەك بەشێوازێكی گونجاو بحەوێنەوە، دەبێت جۆری بەسەر بردنی ژیانی یەكتر سەركۆنە نەكەن؛ بەڵكوو تائەو جێگایەی كە دەگونجێت لە شێوازی ژیانی یەكتر ڕێز بگرن.
بۆ گەیشتن بە یەكگرتنی لەبار و شیاو، باش وایە كە جەخت لەسەر خاڵە هاوبەشەكان بكەینەوە، چونكە ئەگەر وانەبێت بە هۆی سەرقاڵبوون بە خاڵە ناكۆكەكان لە گەیشتن بە ئامانجەكانیان دەمێنینەوە.
ئێمە باوەڕمان بە پەروەردەی پۆزەتیڤی مرۆڤ هەیە كە لە جیاتی بیری تێكدەرانە و ڕووخێنەر، چاكسازی و بنیاتنان لە مێشك و هزریدا جێگیر بووبێت، بە كەمترین كەرەسە و دەرفەت و لە داخراوترین مەودا و باروودۆخدا، ڕۆڵ و كاریگەری خۆی ببینێت، چاو لە دەستی خەڵكانی تر نەبێت كە كەند و كۆسپەكانی ژیانی بۆ چارەسەر كەن. بەبیانووی پیلانی دۆژمنان پاساو بۆ كەموكورتی و هەڵەكانی خۆی نەهێنێتەوە، بە فێڵ و كەڵەكەی جۆراوجۆری شەر‌‌عی و سیاسی، چارەنووسی خۆی و كۆمەڵگاكەی بە خەڵكانی تر نەسپێرێت. بەبیانووی ئەوەی كە بارودۆخ و مرۆڤەكان خەراپ و گەندەڵن، ئەركی مرۆڤدۆستانەی لەبیر نەكات. هاوكات لەگەڵ ڕەخنە، پێشنیار و ڕێنمونیشی هەبێت.
ئیسلاح وێب بە شێوەیەكی شارستانیانە و سەردمیانە و بەوپەڕی سینگ‌فراوانییەوە بۆ پێكهێنانی بواری گەشە و پەرەپێدانی هەمەلایەنەی ژیانی تاكەكەسی و كۆمەڵایەتی خەڵكی ئێران بەگشتی و خەڵكی كوردوستانیش بەتایبەتی لەژێر تیشكی بڕواداربوون بە كەڕامەتی زاتی مرۆڤ، ئازادی، دادپەروەری، قەبووڵكردنی بیروڕای جیاواز و بایەخە ڕەوشتییە بنەڕەتییەكان لە گشت سووچە كانی ژیان تێدەكۆشێت.
ئیسلاح وێب پێگەیەكە بۆ زانین، لێكۆڵینەوە، شیكردنەوەی ڕووداوەكان و بابەتە جۆربەجۆرەكانی وڵاتی كوردەواری، ئێران و جیهان.
ئیسلاح وێب لە هەڵبژاردن و بڵاوكردنەوەی بابەتەكان دو پێوەری نەگۆڕاوی هەیە:
یەكەم) گەشەكردنی عەقڵانییەتی مرۆڤی كورد بە لەبەرچاوبوون و لەبیرنەكردنی «ڕەوشتی بەرز و داب و نەریتی ڕەسەنی كوردی» بەجۆرێك بتوانێت لە جیهانی ئەمڕۆدا بژیت و مامەڵە و پێوەندی ڕاستەوخۆ دەگەڵ ژیان و مرۆڤی سەردەم بكات، بەڵام لە هەمان كاتدا هەر كورد بێت و لاسای كەس نەكاتەوە.
دووهەم) ئەم بڵاوكردنەوە، نەبێتە هۆی چەواشه‌كردنی كۆمەڵگای كوردەواری لەسەر ڕێگای خواناسین وخواپەرەستی كە لە چوارچێوە و قەوارەی تەفسیرێكی میانە لە ئایینی ئیسلام، كە زیاتر لە ١٤٠٠ ساڵە خەڵكی كورد، دەگەڵی ژیاوە و بووەتە بەشێكی جیانەكراوەی ژیانی ئەو گەلە. ئەو ئیسلامەی دوورە لەهەر جۆرە تێڕوانینێكی تەسك و لار و لەوێر، چ لە ڕووی تووندڕەوی و بەستنەوەی ئیسلام بە بیروبۆچوونی دەستەوتاقم و كەسایەتییەكی تایبەتەوە لە دەرەوەی كوردوستان یا لە ناوەوە بێت. چ لەڕووی دوورخستنەوەی خەڵك، بە جۆرێك كە ئەوەندەی سڕ و كەڕ وكاسی بكەن، هەر وەك نەبێت وایە!
بەڵام پێمان واش نییە كە ئەگەر ئەو ئێسلامە نەكرا بە ئایدئۆلۆژیا و سیسته‌مێكی سیاسی و بەناوی دەوڵەتی ئیسلامی، حوكمی پێ نەكرا، ئەوە ئیسلام تێداچووە و كۆمەڵگاكەشمان، كۆمە ڵگای موسوڵمان نییە.
ئەوەی مەبەستی سەرەكی ئێمە زیاتر خواپەرستی و دەگەڵ خوابوونی خەڵك و ئاوەدانكردنەوەی نیشتیمان و ژیان و گوزەرانی خۆشی گەلمانە. وادەزانین ئەگەر خەڵك چەواشە نە‌كرێ و بەزۆرەملی بیروڕای سەیر و بەیری بەسەردا نەسەپێندرێت، ڕوو لە خوا و بەرنامەكەی خوا وەر ناگێرێت و لێی لانادات، بەڵام هەركات تاقم و گروپێك ویستوویانە بیرو بۆچوونی خۆیان بەسەر ئەم خەڵكەدا قاڵ بكەنەوە و بەفێڵ و تەڵەكە لەدڵی جەماوەری كورددا جێگای خۆیان بكەنەوە، زۆری پێ نەچووە، خۆشیان و خەڵكەكەش تووشی زەرەر و زیان بوون و بۆ ماوەیەكی تر، ڕەوڕەوەی ژیان و وزەی گیانیان لەبەرەو پێشەوەچوون وەستاوە و هێزی تێدا نەماوە، هەر بۆیە ئەوەمان بۆ سەلماوە و چەسپاوە كە هیچ كەسایەتی و دەستە و تاقمێك بۆیان نییە خۆیان بە خاوەن و پێوەری ئەم خەڵكە بزانن، چ ئیسلامی بن، چ عەلمانی و چ نەتەوەیی بەڵكوو لە ڕاستیدا، خەڵك و جەماوەر خاوەن و گەورەی هەمووانە و پەسەند و ویستی گەل ، پێوەری بوون و قەبارەی ئەوانە.
بۆ گەیشتن بە كۆمەڵگایەكی ئازاد، سەڕەڕای شارەزابوونی شارۆمەندان بە مافەكانیان، دەبێت بیری ڕەخنەیی لەواندا گەشە بسێنێت، واتە ئاستی بوێری شارۆمەندان دەبێ بگاتە ڕادەیەكی كە پرسیاركردن لە هەموو جۆرە پەیو‌ندییه‌كی ناڕەوای سەپێندراو بەسەر كۆمەڵگادا لە هەموو بوارەكانی ڕامیاری، كۆمەڵایەتی، كلتووری و ئابووریدا بە مافی خۆی بزانێ.
بڕوامان بە جیاوازی بێرو بۆچوون هەیە و وتووێژیش بە باشترین ڕێگاچارە بۆ بردنەسەری ئاستی تێگە یشتنی بەرامبەری خاوەن بیرو ڕا جیاوازەكان دەزانین.
لە كۆتاییدا سەربڵیندی دونیا و دواڕۆژی بەڕێزتان ئاواتمانە و چاوەڕوانی یاریدەی فیكری هەموو لایەكین.
بۆچوونه‌کان