ئه‌مینداری گشتیی جه‌ماعه‌تی ده‌عوه‌ت و ئیسلاح شه‌وی ٦ی ڕێبه‌ندانی ١٤٠٠، له‌گه‌ڵ ئه‌ندامانی په‌یڕه‌و له پارێزگاكانی فارس، هۆرمۆزگان و بووشێهر له‌ڕێی ئێسكای ڕوومه‌وه چاوپێكه‌وتن و وتووێژیان كرد.
له‌و چاوپێكه‌وتنه‌دا، مامۆستا عه‌بدوڕڕه‌حمان پیرانی، ئه‌مینداری گشتیی جه‌ماعه‌تی ده‌عوه‌ت و ئیسلاح سه‌باره‌ت به گرینگی و فه‌زیله‌تی ئه‌خلاق قسه‌ی كرد. ئه‌و سه‌باره‌ت به به‌شه‌كانی ئه‌خلاق وتی: زانایانی ئه‌خلاق، ئه‌خلاق به دوو به‌ش دابه‌ش ده‌كه‌ن: ١) ئه‌خلاقی بنه‌ڕه‌تی، ٢) فه‌زیله‌تی ئه‌خلاقی.
ده‌سته‌یه‌ك له ئه‌خلاق وه‌ك: ڕاستگۆیی، به‌وێنه‌ی یاسا و بنه‌مای ئاسانكاریی ژیان و ژیانه‌وه ڕۆڵێكی بنه‌ڕه‌تی و سه‌ره‌كی ده‌گێڕن. ده‌سته‌ی دووهه‌م جێی گرینگیپێدان و تیشكده‌ر و ڕازێنه‌ری ژیانن و له بازنه‌ی ئاسانكاریی ژیان تێده‌په‌ڕن و شیرینی و جوانی به ژیان ده‌به‌خشن.
ئه‌و له كۆتایی وته‌كانیدا سه‌باره‌ت به گرینگی به‌ڕۆژبوون و پاراستنی ڕه‌سه‌نایه‌تی وتی: هه‌نگاونانی دروست به‌ره‌و داهاتوو، بوونی بیرێكی گشتیی و ڕاستبینانه‌ی یه‌كترقه‌بووڵكردن و به‌ڕه‌وازانین پێویست ده‌كا كه وێڕای پاراستنی بنه‌ما كۆنه‌كان، هه‌ر نوێیه‌كی به‌سوودیش قه‌بووڵ ده‌كا.
ئه‌و هه‌روه‌ها وتی: چوونه نێو ڕۆژگاری نوێ به‌پێی ڕاسپارده‌ی قوڕئانی پیرۆز، پێویستی به هه‌نگاوی به‌رز و ئه‌رێنی و پسپۆڕانه و پارێزكارانه و به‌ره‌وپێش هه‌یه: «لِمَن شَاءَ مِنكُمْ أَن يَتَقَدَّمَ أَوْ يَتَأَخَّرَ» (مودده‌سسیر:٣٧) و ته‌واوی كه‌ره‌سه و توانایی پێویست به‌كار ده‌به‌ین، تاكوو له ئاكامی گۆڕانكارییه‌كان، باشترین و زۆرترین توێشووی ئه‌رێنی هه‌ڵێنجین.
موحه‌ممه‌د خه‌لفانی به‌رپرسی جه‌ماعه‌تی دعوه‌ت و ئیسلاحی لقی هۆرمۆزگان دوای به‌خێرهاتنكردن وتی: ئێوه مامۆستایانی جه‌ماعه‌ت فێرتان كردین كه به دابینكردنی به‌ستێنی گه‌شه و پێشكه‌وتنی هه‌مه‌لایه‌نه‌ی ژیانی تاكه‌كه‌سی و كۆمه‌ڵایه‌تی خه‌ڵك له‌ژێر تیشكی بڕوا به كه‌رامه‌تی سروشتی مرۆڤ، سه‌ربه‌ستی، دادپه‌روه‌ری، ڕاوێژ، یه‌كترقه‌بووڵكردن و به‌ها بنه‌ڕه‌تییه‌كانی ئه‌خلاقی له بواره جۆراوجۆره‌كانی ژیاندا چالاكی بنوێنین و بۆ سازكردنی داهاتوویه‌كی باشتر، پابه‌ند به هاوسه‌نگی و میانه‌ڕه‌وی له بیر و كردار و پێكهێنانی پێوه‌ندی باش له‌گه‌ڵ خه‌ڵك بین. هه‌روه‌ها كه‌رامه‌تی مرۆیی پێویستی به ڕێزگرتن له سه‌ربه‌ستی، مافی مرۆڤ، مافی كه‌مینه‌كانی ئایینی، ئایینزایی؛ نه‌ته‌وه‌یی و گرینگیدان به دیمۆكڕاسی و خۆپاراستن له خوێندنه‌وه‌كانی دژه كرامه‌تی مرۆیییه.
فه‌رزان خامووشی جێگری جه‌ماعه‌تی ده‌عوه‌ت و ئیسلاحی لقی فارس له سه‌ره‌تای وته‌كانیدا به ئاماژه به ئایه‌تی ١٣ سووڕه‌تی حوجوڕات سه‌باره‌ت به ناسین وتی: «يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ»
ئه‌و بنه‌مایه له دوو ڕوویه‌وه جێی سه‌رنج و تێڕامانه. یه‌كه‌م: ناسینی ئه‌ندامان هه‌مبه‌ر یه‌كتر، چونكه یه‌كترناسینی ئه‌ندامان ده‌بێته هۆی هۆگری و ئاوده‌نگی. مرۆڤه‌كان كه یه‌كتر باشتر بناسن و له‌یه‌كتر تێبگه‌ن، ساناتر خوی یه‌كتر ده‌گرن و یه‌كتر قه‌بووڵ ده‌كه‌ن. یه‌كتر قه‌بووڵكردن، به‌رهه‌می یه‌كتر ناسینه.
دووهه‌م: ناسینی ڕێبازێكی كه هه‌ڵنبژاردووه ئه‌و له‌و به‌شه له وته‌كانیدا وتی: هه‌ر بیر و فیكرێك، كاتێك سه‌ركه‌وتوو ده‌بێ كه بڕوا به‌و بیره، به‌هێز بێ و ئیمان به بیرێك به‌هێز نابێ، مه‌گه‌ر به ناسینی زۆرتری ئه‌و. به‌هۆی هه‌سته سێیانه‌كانی «بڕوا» به گه‌وره‌یی ڕیساله‌ت، «شانازیی» به قه‌بووڵكردن و شوێنكه‌وتنی و «هیواداری» به پشتیوانی و په‌سندكردنی خوا، ئه‌و كۆمه‌ڵه ده‌توانێ به ئامانج و مه‌به‌سته‌كانی بگات. گرینگی ئه‌و بابه‌ته له‌كاتێكدا كه ئاژاوه و گرفت له‌هه‌ر لایه‌كه‌وه ئه‌ندامانی له‌خۆی گرتووه، زۆرتر ده‌رده‌كه‌وێ. ئێمه پێویستیمان به پێوه‌ندی زیاتر نێوان به‌رپرسان و ئه‌ندامان هه‌یه.
عیسا ڕه‌حیمی به‌رپرسی جه‌ماعه‌تی ده‌عوه‌ت و ئیسلاحی لقی بووشێهر وتی: له وانه گرینگه‌كانی كه خوای گه‌وره له سووڕه‌تی كه‌هفدا ئاماژه‌ی پێ كردووه، ئه‌وه‌یه كه خوای گه‌وره به‌رده‌وام ویستی خێری بۆ به‌نده‌كانی خۆی هه‌یه و ئه‌گه‌ر به‌پێی خێر و به‌رژه‌وه‌ندی ده‌رگایه‌ك داده‌خا، بێگومان به‌دوای ئه‌ودا ده‌رگایه‌كی ڕه‌حمه‌تی به‌رفراوانتر بۆ به‌نده‌كانی ده‌كاته‌وه. بۆیه ئه‌گه‌ر كۆڕۆنا تا ڕاده‌یه‌ك سنوورداری كردین، به‌ڵام له‌سایه‌ی ڕه‌حمه‌تی خوا و كه‌ڵكی دروست له ده‌رفه‌ت و به‌ستێنه‌كانی دونیای مه‌جازی، ده‌رفه‌تی بواری پێوه‌ندیی زیاتر له جارانیش ته‌یار بوو، بۆیه به‌پێویستی ده‌زانین هه‌م پێوه‌ندی ناوه‌ند له‌گه‌ڵ لقه‌كانی جه‌ماعه‌ت و هه‌م پێوه‌ندیی نێوان ئه‌ندامان له هه‌ر پارێزگایه‌دا پته‌وتر بێ...
ئه‌و هه‌روه‌ها وتی: خاڵێكی تر ئه‌وه‌یكه به‌هۆی ده‌ستپێوه‌گریی له كات و كه‌ره‌سه و له ڕاستای پێشكه‌وتنی ئاستی زانستی و ئێمانی و ڕێكخراوه‌یی ئه‌ندامان، به‌پێی توانا، خولی فێركاری نێوان سێ پارێزگا به‌شێوه هاوبه‌ش به‌ڕێوه بچێت تاكوو هه‌م له تواناییه‌كان كه‌ڵكی باشتر وه‌رگیرێت و هه‌م بوونی كۆی ئیمانی گه‌وره‌تر، دڵگه‌رمی زیاتر به ئه‌ندامان بێبه‌خشێت.
جێی ئاماژه‌یه كه ئه‌و چاوپێكه‌وتنه به خوێندنه‌وه‌ی قوڕئانی پیرۆز له لایه‌ن شێخ حوسێین حه‌موودی ده‌ستی پێ كرد و به‌ڕێوبردنی به‌رنامه‌كه له ئه‌ستۆی موحه‌ممه‌د ڕه‌شیدی بوو.
له كۆتایی ئه‌و چاوپێكه‌وتنه، مامۆستا عه‌بدوڕڕه‌حمان پیرانی وه‌ڵامی پرسیاری ئاماده‌بووانی دایه‌وه. ده‌قی وته‌كانی مامۆستا عه‌بدوڕڕه‌حمان پیرانی بڵاو ده‌كرێته‌وه...
بۆچوونه‌کان