به به‌شداریی ئه‌ندامانی جه‌ماعه‌تی ده‌عوه‌ت و ئیسلاحی ورمێ، كارگه‌ی پسپۆڕیی دلێریی به وتاربێژیی دلێر عه‌بباسی به‌ڕێوه چوو.
دلێر عه‌بباسی «كارناسی باڵای فه‌لسه‌فه‌ی ئه‌خلاق و توێژه‌ری بواری ئایینی» شه‌وی سێشه‌ممه‌ی ٢٨ی به‌فرانباری ١٤٠٠، سه‌باره‌ت به دلێریی قسه‌ی كرد. به‌ڕێزیان ئه‌و چه‌مكه‌ی له دوو لقی بواری تاكه‌كه‌سی و بواری پێوه‌ندیدار به كۆمه‌ڵگاوه شێ كرده‌وه و جه‌ختی كرد كه ئه‌و شاره‌زاییه به‌شێكه له ده شاره‌زایی ڕێكخراوه‌ی ته‌ندروستی جیهانی.
ئه‌و بۆ واتای دلێریی ئاماژه‌ی به بیر و هه‌ست و باوه‌ڕه‌كان كرد به شێوازێكی گونجاو، ڕاسته‌وخۆ، ڕاستگۆیانه و به‌بێ بێ‌ڕێزیكردن.
ئه‌و له درێژه‌دا باسی له قازانجه‌كانی دلێریی كرد و گرینگترینیانی واته باشبوونی پێوه‌ندی نێوان تاكه‌كانی شی كرده‌وه و پاشان ڕێگاكانی دلێریی ئاماژه پێ كرد.
ڕاهێنه‌ری كارگه بۆ گه‌یشتن به دلێریی ئاماژه‌ی به ١٧ ڕێكار كرد كه له گرینگترینی ئه‌وان ده‌كرێ ئاماژه به ئاشنابوون له‌گه‌ڵ مافه بنه‌ڕه‌تییه‌كانی خۆی و فێربوونی هه‌نگاوه‌كانی «نه»وتن بكه‌ین.
دلێر عه‌بباسی له درێژه‌ی وته‌كانیدا، بابه‌تی فێركردنی ده‌ربڕینی هه‌سته‌كان به مناڵان و هه‌روه‌ها گه‌یاندنی په‌یامی ئه‌رێنی به مناڵانی باس كرد.
ئه‌و له به‌شی دووهه‌می كارگه‌كه‌دا، دلێریی له جه‌ماعه‌ت و هاوسه‌نگی نێوان ئیمان و دلێریی شی كرده‌وه. ئه‌و ئیمانی وه‌ك گرینگترین هۆكاری نه‌فس‌به‌رزی و دلێریی هه‌ژمار كرد.
عه‌بباسی وێڕای شیكاریی تایبه‌تمه‌ندییه‌كانی كه‌سانی دلێر له به‌شی كۆتایی كارگه‌كه‌دا وتی: «دلێران خاوه‌ن توانیی پێویستن بۆ پێوه‌ندیی گرتن و هه‌ڵسوكه‌وتی كۆمه‌ڵایه‌تی و به‌پێی پێویست به ساكاری بڕیاره‌كه‌یان ده‌گۆڕن».
عه‌بباسی به ئاماژه به نموونه‌گه‌لێك له دلێریی له ژیانی پێغه‌مبه‌ران، كۆتایی به وته‌كانی هێنا.
بۆچوونه‌کان