بە هۆی ڕوودانی لافاو لە گوندی پەسوێ منداڵێکی تەمەن سێ مانگه گیانی لە دەست دا. به پێی هەواڵی هەواڵنێری ئیسلاح ویب، تەرزە و باران له چیاکانی دەوروبەری گوندی پەسوێی سەر بە شاری پیرانشار، سەر لەبەیانی ئەمڕۆ- 5ی جۆزەردان – لافاوێکی گەروەرەی لەو ناوچەیە لێکەوتەوە. به هۆی ئەم بەڵا سروشتییە تێکڕای ئەو ماڵانەی کە لە ڕەوگەی لافاوەکەدا بوون ڕووخان. لافاوەکە هەروەها زیانی مادی زۆری لێکەوتەوە و منداڵێکی سێ مانگانەش لەو ڕووداوەدا گیانی لە دەست دا. به گوێرەی قسەی شایەتحاڵانی خەڵکی ناوچەکە، خانووبەرەی زیاتر لە 50 بنەماڵە بە تەواوی هاتە ڕووخان و بوو به هۆی دابڕانی ئاو بەرق و گازی ناوچەکە. شایانی باسه هەر لە سەرەتای ڕوودانی لافاوەکە تیمەکانی فریاکەوتن لە ناوچەکە ئامادەبوون و به بەردەوامی خەریکی هاریکاری و گەیاندنی یارمەتی وکاروبارەکانی فریاکەوتنن.